حريرة ديال رمضان لمرضى حساسية القمح

                                           السلام عليكم ورحمة الله تعالى  و بركاته

ليوما جبت ليكم جديد بالنسبة للناس لعندهوم حساسية ديال القمح,أي الناس لي عندهم حساسية من الكلوتين.  

           حريرة ديال رمضان لمرضى حساسية القمح(يعني الناس لمانع عليهم الطبيب مادة الكلوتين ).

المقادير:

كيلو طماطم

1بصلة متوسطة

نص ربطة من معدنوس

نص ربطة من قزبور

ربطة كرافس

زلافة متوسطة ديال الحمص مرطب و منقي

زلافة متوسطة ديال العدس

زلافة متوسطة ديال جلبانة

زلافة متوسطة ديال دشيشة غليظة ديال الذرة

3 معالق كبار مطيشة الحك

رابعة اللحم

ملح 

ملعقة ابزار

ملعقة خرقوم عود مطحون

ملعقة السمن الحار

4 معالق مايزينا

طريقة التحضير:

ناخدوا مطيشة نقطعوها ونطحنوها فخلاط كهربائي نزيدوا بصلة نطحنوها .

ناخدوا طنجرة الضغط نكبوا فيها الخليط مطيشة و بصلة نزيدو عليها كل من الحمص الجلبانة و العدس والكرشان ديال الذرة اللحم مقطع قزبور و معدنوس وكرافص مقطعين رقاق و العطرية اللي ذكرنا .نخليو الخليط يتقلى مزيان نضيفوا 2 لتر الماء نسدوا طنجرة الضغط اللي هي الكوكوت نخليوها تصفر 30 دقيقة ونحلوا عليها نضيفوا مطيشة الحك .ناخدوا 4 معالق مايزينامع الماء  باش نخلطوا الحريرة.

ملاحظة :

هاذ الحريرة صحية وممكن يشربوها كل افراد العائلة ماشي غير مرضى حساسية القمح.

                                                 بالصحة والراحة.